فجر سيد عبدالحفيظ مدير الكرة السابق في النادي الأهلي مفاجأة من العيار الثقيل عن فشل انضمام الراحل أحمد رفعت لصفوف القلعة الحمراء.
قال سيد عبدالحفيظ عبر تصريحات تليفزيونية:
اللي فصل أحمد رفعت عن الانضمام إلى الأهلي فكرة جت في دماغي الساعة 2 بليل.
تابع: الصبح في يناير 2023 أحمد رفعت، كان في النادي الأهلي وكنا اتفقنا خلاص على كل حاجة، وكنا لا نعلم أي تفاصيل عن أزمة سفر اللاعب في الإمارات.
أضاف: الصبح كان أحمد رفعت، هيجي يمضي معانا بعد ما اتفقنا مع نادر شوقي على كل حاجة.
استطرد: الساعة واحدة ونصف اتنين بليل. جاتلي حاجة في دماغي عن الخناقة بتاعة جنش وأحمد رفعت، الله يرحمه، في مباراة ببطولة أفريقيا وأحمد لم يلعب مع فيوتشر في الـ 6 شهور الأولى في الدوري لأن الدوري ابتدى في شهر سبتمبر وانتقل للوحدة.
واصل: جت حاجة في دماغي هل مباراة فيوتشر مع الفريق الأفريقي، كانت في موسم 2022- 2023 أم الموسم اللي قبله، هتتحسب في أنهي موسم، هو بالفعل لم يشارك في الدوري.
وزاد: المباراة لو اتحسبت من الموسم اللي قبل 2022 -2023 مفيش مشكلة يلعب في الأهلي، ولكن لو اتحسبت في الموسم ده، مينفعش يلعب في أي نادي تاني غير ناديي فيوتشر والوحدة، لأن انتقاله للأهلي سيكون الثالث.
وقال أيضا: كلمت الكابتن محمود الخطيب، الساعة 2 بليل وقولتله (المباراة دي هتتحسب تبع أي موسم، لأنه لو رجع عندي مش هيلعب تاني، مينفعش يلعب.
أردف: وكلمت نادر شوقي، قولتله (لازم نوقف كل حاجة لحد ما أسأل اتحاد الكرة مباراة فيوتشر في افريقيا كانت تبع أنهي موسم..
واختتم حديثه قائلا: سألنا اتحاد الكرة وبالفعل كانت هذه المباراة في نفس الموسم، لذلك فشل انتقال أحمد رفعت، إلى الأهلي.